धादिङका क्रसर उद्योगको मनोमानी

धादिङबेसी चैत्र २५

सरकारले रोडा, ढुंगा र गिट्टी बालुवा निकासीमा रोक लगाए पनि धादिङमा त्यसको उल्लंघन भएको छ । धादिङका अधिकांश क्रसर उद्योगले खोलाबाट ढुंगा, गिट्टी निकाल्ने क्रमलाई निरन्तरता दिएका छन् ।

क्रसर उद्योगको मनोमानीले सार्बजनिक सम्पतिको क्षति र वातावरणमा प्रतिकूल असर परेको स्थानीयको गुनासो छ । धादिङका कतिपय क्रसर उद्योगले खोलाको बगर र सार्बजनिक ऐलानी जग्गा अतिक्रमण गरे पनि संबन्धित निकाय मौन बसेको स्थानीयको गुनासो छ । कतिपयले आफ्नो क्षेत्राधिकारभन्दा बाहिर गएर क्रसर उद्योग सञ्चालन गरेका छन् । मलेखु खोलाको पुलभन्दा दक्षिणतर्फ १० मिटर गहिरो र पचास मिटर लामो खाडल खनेर गिट्टी बालुवा निकालिएको छ । पुलभन्दा पाँच सय मिटर वरपर गिट्टी बालुवा निकाल्न नपाइने नियम भए पनि त्यसको बेवास्ता गरिएको छ । अनधिकृत रुपमा गिट्टी बालुवा निकाल्ने क्रम जारी रहेपछि नदिमा रहेका पुलहरु समेत जोखिममा परेका छन् ।